أول طريق "التخن"

الدكتور "محمد أبو الغيط"

السمنة بدأت تنتشر بين الأطفال بشكل ملحوظ وفي كل الأعمار… الأم مسئولة عن سمنة طفلها؟

نفسنا أطفالنا ياكلوا صح… والسمنة المنتشرة بين الأطفال سببها الأخطاء الشائعة اللي أغلب الأمهات بتقع فيها وهي مع الأسف موروثة ومعتقدين إنها صح، وأخطر حاجة الوجبات السريعة وسندويتشات الهامبورجر والسوسيس والوجبات الجاهزة السريعة المتروكة أمام الطفل طوال النهار لأن الطفل خارج المنزل أو لأن الأم مش فاضية تجهز أكل في البيت صحي وآمن من الملوثات….

من الأسباب اللي بتخلي الطفل يحب ياكل من بره التنوع في الشكل والطعم وهو شيء بيفتقده في أكل البيت التقليدي… هنا مهمة الأم إنها تحاول ترجع الطفل لأكل البيت بكل الطرق يعني تحاول تقلد شكل الوجبات الجاهزة لكن الطعم يكون صحي من غير إضافة المواد الدهنية.. لازم الطفل يتغذى صح من مرحلة الرضاعة..

ازاي الطفل يرضع صح؟
بقدر الإمكان تحاول الأم الالتزام بالرضاعة الطبيعية وتهتم بكمية اللبن ولو فشلت في توفير لبن صحي وفير للطفل تلجأ للبن الصناعي والطفل يرضع صح معناه إن الأم تاكل هي كمان صح.. التغذية الصحيحة تعتمد على المواد الغذائية المدرة للبن زي الورقيات والعصائر لازم تشرب سوائل بكميات كبيرة طوال فترة الرضاعة؛ كل الأنواع لكن تتجنب مثلا عصير المانجو لأن سعراته الحرارية عالية جدا، تهتم بشرب اللبن ولو خايفة من زيادة الوزن تركز على عصائر التفاح والجوافة والبرتقال والجريب فروت واللبن خالي الدسم.. الطفل مش عاوز الدهون عاوز البروتينات والأحماض الأمينية وبلاش تشرب موغات بالسمن البلدي والمكسرات بحجة إنها بتدر اللبن على فكرة دي معلومة غلط الجرجير والخس بيساعدوا على إدرار اللبن أكتر من الموغات والحلاوة والعسل الأسود والمربات..

من الحاجات المفيدة جدا "الشمر" وهو زي الينسون ممكن الأم تغليه وتحليه بمعلقة عسل نحل وتشربه بيدر اللبن جدا وكمان مهدئ للطفل لأنه بينزل في لبنها... أفضل بكتير من البيبسي والمشروبات الغازية بكل أشكالها، والشاي والقهوة بتنزل في اللبن وبتخلي الطفل عصبي جدا، أو تتسبب له في اضطرابات في النوم.

المواد المفيدة اللي بتنصح بها أثناء الرضاعة؟
الأسماك من المواد الغذائية التي تحتوي على "الأوميجا 3" الدهون غير المشبعة وهي مهمة جدا لاكتساب المناعة للأم والطفل واللحوم قليلة الدسم.. كمان تهتم بالمكسرات زي "اللوز" بس يكون مسلوق وتاكله "نيء" يعني من غير ما يكون متحمص أو عليه ملح عشان الأم ماتتخنش.

تهتم جدا بالسلطة الخضراء وتكون ملونة على قد ما تقدر يعني فيها كل أنواع الخضار والورقيات وكل ما كان الخضار شديد الإخضرار معنى كده إنه بيحتوي على كالسيوم بنسبة عالية جدا جدا.. بالإضافة للمكملات الغذائية اللي بينصح بها طبيب النساء..

بعض السيدات بيرفضوا الرضاعة الطبيعية خوفا من زيادة الوزن..!!
غير صحيح إن الرضاعة بتزود الوزن، على العكس الرضاعة بتخلي الجسم يحرق سعرات حرارية عالية جدا، ولو الأم التزمت بقائمة الممنوعات زي المحمرات والموغات والبط واللحوم الدسمة والحلاوة والعسل الأسود والطحينة والمشروبات الغازية وأكلت بس الوجبات الرئيسية وشربت عصائر ولبن خالي الدسم كتير مش هاتتخن أبدا بل هاتقلل من وزنها جدا بشكل سريع، وزنها الزايد بسبب الحمل هاتتخلص منه بسرعة وهايرد الرحم مكانه في أسرع وقت.. بس لو التزمت وأكلت صح وبطلت تسمع النصايح الغلط الموروثة "كلي أنت بترضعي...!!!"

ازاي الأم تبعد عن طفلها مخاطر السمنة مع بداية تذوقه للأكل؟
يبدأ الطفل يتعرف على الأكل من شهره السادس ومش قبل كده عشان تحافظ عليه من أمراض اضطرابات الهضم أو الإصابة بأي نوع من أنواع الحساسية التي قد يصاب بها لو أكل قبل الشهر السادس... لبن الأم لا يحتوي على مادة الحديد بعد الشهر السادس زي صفار البيض، ونخلط الزبادي بأي مادة تحتوي على الفيتامينات المطلوبة وعلى فكرة الطفل في المرحلة دي مش بيميز بين الحلو والحادق...

ومن الحاجات اللي الدراسات أوصت بتأخيرها في الشهور الأولى عسل النحل وعصير البرتقال لأنه ثبت علميا إنه أحد الأسباب التي تؤدي للإصابة بالقولون العصبي لو الطفل شربه قبل سنة ونص.

وعشان نحافظ عليه من السمنة لازم نوفر له ممارسة الحركة ولا ننزعج من كثرة الحركة لأن الطفل قليل الحركة معرض للسمنة ومؤشر على احتمال إصابته بأمراض نفسية أو خلل في وظائف الغدة الدرقية.

لما يكبر شوية لازم يفهم إن الرياضة مش نت وبلاي استيشن الرياضة حركة وتنطيط وجنبها وجبة "كومبو "...!!!